Անկարգություններ` Լամպեդուզում

Երեկ իտալական Լամպեդուզ կղզում ապստամբել են թունիսցի փախստականները: Պատճառն անցած շաբաթ Իտալիայի եւ Թունիսի կառավարությունների միջեւ ձեռք բերված պայմանավորվածությունն է, ըստ որի` փախստականներին վերադարձնելու են հայրենիք:

Փախստականները փորձել են այրել իրենց ժամանակավոր ճամբարը. հրդեհի մարման համար ստիպված են եղել հրշեջ բրիգադ կանչել. տեղեկացնում է mignews.com-ը:

Ապրիլի 5-ին ստորագրված պայմանավորվածության համաձայն` Իտալիան ժամանակավոր կացության իրավունք է տրամադրելու մինչեւ ապրիլի 5-ը Լամպեդուզ հասած փախստականներին: Այդ ամսաթվից հետո ժամանածներն անհապաղ կտեղափոխվեն Թունիս:

Ընդհանուր առմամբ, այս տարվա սկզբից Լամպեդուզում ափ է իջել մոտ 25 հազար միգրանտ:

Իտալիայի վարչապետ Սիլվիո Բեռլուսկոնիի խոսքերով` Իտալիայում գտնվող թունիսցի փախստականների 80 տոկոսը մտադիր է տեղափոխվել Ֆրանսիա` հարազատների ու ընկերների մոտ: