ՀԱՊԿ երկրներում գործողության ընթացքում առգրավվել է ավելի քան 11 տոննա արգելված նյութ

Հոկտեմբերի 26-30-ը ՀԱՊԿ անդամ պետությունների տարածքում անցկացվել է «Կանալ-Կասպյան փարոս» ենթատարածաշրջանային հակաթմրանյութային գործողությունը։ Ամփոփվել են դրա նախնական արդյունքները։

Գործողության նպատակն էր կանխել թմրանյութերի մուտքը ՀԱՊԿ պատասխանատվության գոտի, բարձրացնել թմրանյութերի ապօրինի շրջանառության դեմ պայքարի արդյունավետությունը Տրանսկասպյան միջազգային տրանսպորտային միջանցքում, վնասազերծել միջազգային թմրախմբավորումները, վերացնել ընդհատակյա արտադրամասերը և խաթարել թմրաբիզնեսի տնտեսական հիմքերը։

Գործողությանը ներգրավվել է Բելառուսի, Ղազախստանի, Ղրղզստանի, Ռուսաստանի և Տաջիկստանի շուրջ 9 հազար աշխատակից, ինչպես նաև Չինաստանի և Իրանի ավելի քան 2 հազար ներկայացուցիչ։

Համատեղ միջոցառումների արդյունքում բացահայտվել է թմրանյութերի ապօրինի շրջանառության հետ կապված 790 հանցագործություն, այդ թվում՝ մաքսանենգության 81 դեպք։ Բացահայտվել է թմրախմբավորումների գործունեության 101 դեպք։

ՀԱՊԿ անդամ երկրների, ինչպես նաև Չինաստանի և Իրանի տարածքներում ապօրինի շրջանառությունից առգրավվել է ավելի քան 11,4 տոննա արգելված նյութ։ Դրանց թվում են՝

շուրջ 11 տոննա թմրամիջոց,

9,4 կգ հոգեմետ նյութ,

23 կգ ուժեղ ներգործող նյութ,

8 տոննա պրեկուրսոր,

թմրանյութ պարունակող բույսերի շուրջ 200 հազար թուփ,

արգելված նյութեր պարունակող ավելի քան 153 հազար հաբ։

Առգրավվել է նաև 213 միավոր հրազեն և տարբեր տրամաչափի 1722 փամփուշտ։

Թմրանյութերի ապօրինի շրջանառության հետ կապված հանցագործությունների համար ձերբակալվել է 376 անձ, որոնցից 135-ը ՀԱՊԿ անդամ չհանդիսացող պետությունների քաղաքացիներ են։ Ձերբակալվածներից 59-ը հետախուզման մեջ են եղել։

Բացահայտվել է նաև 674 ինտերնետային կայք, որոնց միջոցով տարածվել է թմրանյութերի վերաբերյալ արգելված տեղեկատվություն։

Նախնական տվյալներով՝ ՀԱՊԿ անդամ երկրների տարածքում ապօրինի շրջանառությունից առգրավվել է ավելի քան 1 տոննա 260 կգ մարիխուանա, ավելի քան 232 կգ հաշիշ, 47 կգ ալֆա-PVP, ավելի քան 68 կգ մեթեդրոն, 31 կգ հերոին և շուրջ 3 կգ պրեկուրսոր։

Թմրամիջոցների, հոգեմետ նյութերի և դրանց պրեկուրսորների մաքսանենգ տեղափոխումը կանխելու նպատակով Ռուսաստանի Չելյաբինսկի մարզում կազմակերպվել է առանձին հակաթմրանյութային գործողություն։ Այն իրականացվում է Ռուսաստանի ՆԳՆ և Դաշնային մաքսային ծառայության համապատասխան ստորաբաժանումների ու Ղազախստանի իրավասու մարմինների համատեղ ջանքերով՝ ռուս-ղազախական սահմանը հատող անձանց և տրանսպորտային միջոցների նկատմամբ։

Եվրասիական խմբի ֆինանսական հետախուզության ստորաբաժանումների միացյալ պատվիրակությունը զեկուցել է, որ գործողության ակտիվ փուլում բացահայտվել է ավելի քան 80 հազար ֆինանսական գործարք՝ ընդհանուր առմամբ ավելի քան 1 միլիարդ ռուբլու չափով։

Գործարքների զգալի մասը կապված է եղել ֆիզիկական անձանց, այդ թվում՝ թմրաբիզնեսի համար գումարներ փոխանցող միջնորդների հաշիվներին փոխանցումների, դրանցում միջոցների կուտակման և հետագա կանխիկացման, ինչպես նաև կրիպտոարժույթի փոխարկման հետ։