Թե ինչպես կարող է ամբողջ իրավապահ համակարգ վերածվել խեղկատակության․ քաղաքագետը՝ Կարապետյանի նոր մեղադրանքների մասին

Քաղաքագետ Արա Պողոսյանը գրում է․ «Սամվել Կարապետյանի մեղադրանքը փոփոխվել է: Այս մասին հայտնել են Քննչական կոմիտեից:

Քրեական օրենսգրքի ևս երկու կետ է ավելացվել՝ «Քրեական օրենսգրքի 296-րդ հոդվածի 3-րդ մասի 2-րդ և 3-րդ կետերը (իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով առանձնապես խոշոր չափերով փողերի լվացումը)»։

Չէ, բայց դուք պատկերացրեք, թե մեկ հոգու ցանկությամբ ինչպես կարող է ամբողջ իրավապահ համակարգը վերածվել խեղկատակության։

Սա այլևս քաղաքականություն չէ, սա վենդետա է այն մարդկանց նկատմամբ, ովքեր համաձայն չեն իշխող խմբի կողմից վարվող քաղաքականության հետ։ Ընդ որում՝ սա առաջին դեպքը չի և վստահաբար, նաև վերջինը չի լինելու։

Այս ճանապարհը երկիրը դեպի լիակատար ավտորիտարիզմի տանող ճանապարհ է, որտեղ այլախոհներին սպառնում են սահման տանելով, բանտեր ուղարկելով, ձերբակալելով և ծեծելով, մարդկանց ինքնասիրության ու արժանապատվության հետ խաղալով․․․

Այս տրամաբանական հարցերին միշտ հնչում է մի զզվելի պատասխան․ «բա լա՞վ էր նախկինների ժամանակ․․․ բա մոռացե՞լ եք․․․»։ Ու հենց այս հարցադրումն անողներն են, որի լեգիտիմացնում են Հայաստանում ավտորիտարիզմի ու բռնապետության հաստատմանը, որտեղ մարդը, քաղաքացին ո՛չ թե գերագույն արժեք է, այլ իշխանությանը սովորական ծափահարող մի ծաղրածու, ում աջ ու ձախ քշելով կարելի է սեփական կամքն ու «էգո»–ն բավարարել»։