Հունաստանը հիասթափված է Մադրիդի քաղաքականությունից

Հունաց արտաքին գործերի փոխնախարար Միլտիադիս Վարվիցիոտիսը իսպանական El Pais թերթին տված հարցազրույցում ասել է, որ Աթենքը դժգոհ է Անկարայի և Մադրիդի միջև պաշտպանական համագործակցության ամրապնդման պլանների մասին վերջին հայտարարություններից։

«Թուրքիան չի հարգում միջազգային իրավունքը»,- ասել է նա՝ նշելով, որ Հունաստանը ցանկանում է կայունացնող դեր խաղալ տարածաշրջանում և կողմ է Միջերկրական ծովում անվտանգության ռազմավարական առանցքի ամրապնդմանը, մինչդեռ Թուրքիան քաղաքականություն է վարում «ռազմական  ուժի» տեսանկյունից:

«Մենք փորձում ենք զարգացնել մեր հարաբերությունները տարածաշրջանի բոլոր երկրների, հատկապես՝ Կիպրոսի Հանրապետության, Իսրայելի և Եգիպտոսի հետ»,- հավելել է նա՝ ընդգծելով, որ ԱՄՆ-ի և Ֆրանսիայի հետ պաշտպանական համաձայնագրերը կարգավորվում են Եվրոպական պաշտպանական մեխանիզմով։