Իրանը կկարողանա միջուկային ռումբ ստեղծել 2-3 ամսից. Իսրայելի պաշտպանության նախարար

Իրանը երկու-երեք ամսվա ընթացքում կկարողանա արտադրել բավարար նյութ և հզորություն ստեղծել, ինչը հնարավորություն կտա նրան ստեղծելու միջուկային ռումբ: Այս մասին Foreign Policy-ին տված հարցազրույցում հայտարարել է Իսրայելի պաշտպանության նախարար Բենի Գանցը:

Նրա խոսքով՝ դիվանագիտական ջանքերը չեն օգնի զրոյացնել միջուկային զենքի ոլորտում Իրանի առաջընթացը: Նա նշել է, որ, Իսրայելի տեսանկյունից, Իրանին զսպելու արդյունավետ միջոց կլինի ԱՄՆ-ի, Ռուսաստանի, Չինաստանի և Եվրոպայի կողմից Թեհրանի վրա քաղաքական, դիվանագիտական ու տնտեսական ճնշում գործադրելը: «Իրանը պետք է վախենա, որ ԱՄՆ-ը և նրա գործընկերները լուրջ են տրամադրված»,- ասել է Գանցը:

Նա նաև զգուշացրել է, որ տարածաշրջանում միջուկային սպառազինությունների մրցավազք կարող է սկսվել, եթե Իրանը հասնի իր նպատակին: