Եթե Իրանը ցանկանար միջուկային զենք ստեղծել, կաներ դա. Զարիֆ

Իրանը կարող է ուրանի հարստացման մասին իր որոշումը վերանայել մի քանի ժամվա ընթացքում: Այդ մասին ասել է Իրանի ԱԳ նախարար Մոհամադ Ջավադ Զարիֆը NBC-ին տված հարցազրույցում. հայտնում է РИА Новости-ն:

Հարցին` չի վախենո՞ւմ Իրանը, որ կրակի հետ է խաղում, Զարիֆն ասել է, որ հենց ԱՄՆ-ն է կրակի հետ խաղում` իրանական միջուկային գործարքից դուրս գալով:

«Մենք ունեինք համաձայնագիր, այն պարտականություններ էր ներառում, եթե կողմերից մեկը սկսում է այն խախտել… Մենք ազատ կարող ենք դադարեցնել գործարքի մասնակի կատարումը»,- ասել է Իրանի արտգործնախարարը` հավելելով, որ, եթե Իրանը ցանկանար միջուկային զենք ստեղծել, ապա կաներ դա, սակայն չի ցանկանում: