Թուրքիայի նախագահը դատապարտել է ՄԻԵԴ-ի վճիռը

Թուրքիայի նախագահը հիմա էլ հարձակվել է Մարդու իրավունքների եվրոպական դատարանի վրա: Բանտարկության մեջ գտնվող քուրդ քաղաքական գործիչ Սելլահաթթին Դեմիրթաշին ազատ արձակելու պահանջով Եվրոպական դատարանի վճիռը, Ռեջեփ Էրդողանի պնդմամբ, անօրինական է ու ամբողջովին քաղաքականացված:

«ՄԻԵԴ-ը պաշտպանել է ահաբեկչի: Միայն թուրքական դատարանները կարող է վճիռ ընդունել Դեմիրթաշի գործով»,- նշել է Թուրքիայի նախագահը:

Հիշեցնենք, որ Ստամբուլի ծանր հանցագործությունների դատարանը ահաբեկչական կազմակերպության օգտին քարոզչություն անելու մեղադրանքով Դեմիթաշին դատապարտել էր ազատազրկման 4 տարի եւ 8 ամիս ժամկետով: Մինչդեռ Եվրոպական դատարանը վճռել է, որ Դեմիրթաշի բանտարկությունը հանգեցրել է մարդու իրավունքների կոնվենցիայի 5 հոդվածների խախտմանը, ու Թուրքիան պետք է անհապաղ միջոցներ ձեռնարկի նրան ազատ արձակելու համար: