Թուրքիայում լույս է տեսել համշենահայերի «Գոռ» հանդեսի հերթական համարը

Թուրքիայում հրատարակվել է համշենահայերի «Գոռ» ամսագրի հերթական համարը։ Այդ մասին հաղորդում է Bianet.org լրատվակայքը։ Հանդեսի նոր համարը լույս է տեսել «Համշենցիների՝ յայլաներ բարձրանալու մշակույթը» խորագրով։

Աղբյուրի համաձայն՝  սույն ամսագիրը տպագրվում է Թուրքիայում բնակվող մի խումբ համշենցիների կողմից, որոնց շարքում են գտնվում նաև երաժիշտ, «Վովա» խմբի անդամ Հիքմեթ Աքչիչեքը, Համշենի վերաբերյալ իր ուսումնասիրություններով և հայոց լեզվի՝ Համշենի բարբառով հրատարակած գրքերով հայտնի Մահիր Օզքանը և բանաստեղծ Իբրահիմ Քարաջան։

Հիշեցնենք, որ «գոռ» բառը հայոց լեզվի՝ Համշենի բարբառով նշանակում է՝ հավաքական աշխատանք։ Ամսագիրը սկսել է հրատարակվել 2014 թ․ սեպտեմբերին, 6-ամսյա պարբերականությամբ։ Հանդեսի նպատակն է Համշենի մշակույթի և լեզվի տարածումն ու հետագա սերունդներին փոխանցումը։

Մելինե Անումյան

Akunq.net