Նիդերլանդներում ՀՀ դեսպանը հանդիպել է D66 կուսակցության արտաքին հարաբերությունների խոսնակի հետ

Մայիսի 13-ին Նիդերլանդներում ՀՀ դեսպան Տիգրան Բալայանը հանդիպում ունեցավ կառավարական կոալիցիայի D66 կուսակցության արտաքին հարաբերությունների խոսնակ, խորհրդարանի արտաքին հարաբերությունների հանձնաժողովի անդամ Շյուրդ Շյուրցմայի (Sjoerd Sjoerdsma) հետ:
 
Դեսպան Բալայանը շնորհակալություն հայտնեց Հայաստանին առնչվող հարցերին մշտական ուշադրության, Հայոց ցեղասպանության ճանաչման և դատապարտման ուղղությամբ հետևողական ջանքերի համար։

Տիգրան Բալայանը Շյուրդ Շյուրցմային ներկայացրեց Հայաստանում տեղի ունեցող լայնածավալ բարեփոխումների գործընթացը, իշխանությունների կողմից կոռուպցիայի դեմ տարվող պայքարը, ժողովրդավարական ինստիտուտների ամրապնդմանը և մարդու իրավունքների պաշտպանության մակարդակի բարձրացմանն ուղղված քայլերը՝ կարևորելով գործընկեր երկրների աջակցությունը Հայաստանի կառավարության ջանքերին։
 
Զրույցի ընթացքում անդրադարձ արվեց հայ-հոլանդական հարաբերությունների ընդլայնման ուղղությամբ նախաձեռնություններին և դրանց կյանքի կոչման ուղիներին։ D66 կուսակցության արտաքին հարաբերությունների խոսնակն իր աջակցությունը հայտնեց հնչեցված նախաձեռնություններին։