Իրաքը երրորդ կողմի թույլ չի տա իր տարածքն օգտագործել Իրանի դեմ. Իրաքի վարչապետ

Իրաքը թույլ չի տա որեւէ երկրի իր տարածքն օգտագործել մեկ այլ երկրի դեմ: Այս մասին հայտարարել է Իրաքի վարչապետ Ադել Աբդելմահդին` մեկնաբանելով նախօրեին ԱՄՆ նախագահ Դոնալդ Թրամփի՝ Իրաքում ամերիկյան ռազմաբազայի մասին հայտարարությունը. տեղեկացնում է ԻՌՆԱ-ն:

Հիշեցնենք, որ ԱՄՆ նախագահը CBS հեռուստաընկերությանը տված հարցազրույցում նշել էր, որ Իրաքում տեղակայված ԱՄՆ ռազմաբազան հնարավորություն է ընձեռում հետևելու Իրանին, որն, ըստ նրա, «իսկական խնդիր» է:

Աբդելմահդին նաև հերքել է Իրաքում ռազմաբազա ունենալու մասին` Թրամփի հայտարարությունը: «Իրաքում հաստատված ամերիկյան զորքն ուսումնամարզական ստորաբաժանում է, որն Իրաքում է միջազգային կոալիցիայի շրջանակում»,- ասել է նա:

Ավելի վաղ Իրաքի նախագահ Բարհամ Սալեհն ու խորհրդարանի նախագահ Մուհամմեդ ալ Հալբուսին, նույնպես մեկնաբանելով ԱՄՆ նախագահի հայտարարությունը, նշել էին, որ այն հակասում է Իրաքի Սահմանադրությանն ու ինքնիշխանությանը և անընդունելի է: