Հավանականությունը մեծ է, որ կհամագործակցեմ «Ծառուկյան դաշինք»-ի հետ. Լյուդմիլա Սարգսյան

ԱԺ  ՀԱԿ խմբակցության պատգամավոր, ՎՍԴՀԿ ղեկավար Լյուդմիլա Սարգսյանը Yerkir.am-ի հետ զրույցում նշեց, որ երկու օրվա ընթացքում պարզ կդառնա՝ ում հետ է համագործակցելու՝ առաջիկա խորհրդարանում ընդգրկվելու համար: «Հավանականությունը մեծ է, որ կհամագործակցեմ «Ծառուկյան դաշինք»-ի հետ»,- ասաց նա:

Հարցին՝ առաջարկը նրա՞նց կողմից է եղել, թե՞ ինքն է համագործակցելու պատրաստակամություն հայտնել, Սարգսյանը պատասխանեց, որ իր համար էական նշանակություն չունեցող գործոն է, թե ում կողմից է եղել համագործակցություն առաջարկը:

Նշենք նաև, որ  տևական ժամանակ է` Սարգսյանը հայտարարում է՝ ՀԱԿ-ի հետ համագրոծակցությունն առաջիկա խորհրդարանում անիրատեսական է լինելու, իսկ ԲՀԿ-ի հետ համագործակցությունը՝ հավանական: Նրա խոսքով՝ իր և ԲՀԿ ներկայիս ղեկավար Նաիրա Զոհրաբյանի միջանձնային հարաբերությունները բավականին լավ են, բայց թե այդ հարաբերություններն ի՞նչ գործընկերային հարաբերությունների կվերածվեն, ցույց կտա ժամանակը: