Ցավում եմ. նախարարը՝ Սեյրան Օհանյանի կնոջ հետ չաշխատելու մասին

ՀՀ առողջապահության նախարար Լևոն Ալթունյանն այսօր խորհրդարանում լրագրողների հետ զրույցում, խոսելով ՀՀ պաշտպանության նախկին նախարար Սեյրան Օհանյանի տիկնոջ՝ Ռուզաննա Խաչատրյանի` պաշտոնից հեռանալու մասին տեղեկություններին, և արձագանքելով դիտարկմանը, թե կարծես, Խաչատրյանը ևս ցանկություն չունի աշխատելու նրա հետ, պատասխանեց, որ ցավում է դրա համար:

Հարցին, թե, փաստորեն, Խաչատրյանը արձակուրդից հետ չի գնալու աշխատանքի, Ալթունյանը պատասխանեց, որ եթե Ռուզաննա Խաչատրյանը այդպիսի ցանկություն ունի, ինքը պատրաստ է մակագրել դիմումը:

«Ասում են, որ Դուք արդեն նրա սենյակում բերել-նստեցրել եք փոխնախարարին» դիտարկմանը նախարարն արձագանքեց. «Փոխնախարարը նստած է իր սենյակում, սենյակը պատկանում է պետական գույքի կառավարման մարմիններին: Նախարարության մեջ չկա Ռուզաննա Խաչատրյանի սենյակ, Լևոն Ալթունյանի սենյակ, սենյակը պատկանում է պետությանը, և այնտեղ նստում են պետական անձինք: Ես ցանկություն ունեմ աշխատելու ցանկացած անձի հետ, ով օգուտ կբերի ընդհանուր գործին»: