Վստահեցնում են, թե մինչև դեկտեմբեր գազալցակայանները փորձաքննություն կանցնեն

Այսօր ԱԺ պաշտպանության, ազգային անվտանգության և ներքին գործերի մշտական հանձնաժողովում կազմակերպվել էին լսումներ` «Տեխնիկական անվտանգության խնդիրները» թեմայով: Քննարկման առարկա դարձան վերելակների, գազալցակայանների ու կարուսելների տեխնիկական անվտանգության հետ կապված հարցերը:

ՀՀԿ-ական պատգամավոր Արտակ Զաքարյանը բարձրացրեց վերելակների փորձաքննության հարցը:

ՀՀ տարածքային կառավարման և արտակարգ իրավիճակների նախարարի տեղակալ Հայկարամ Մխիթարյանը նախ նշեց, որ վերելակները գտնվում են համատիրությունների հաշվեկշռում, և կան համատիրություններ, որոնք համառորեն չեն ցանկանում անցնել փորձաքննություն, և մեծ մասամբ այն պատճառով, որ չունեն համապատասխան ֆինանսական միջոցներ, որովհետև փորձաքննությունը պետք է ամրագրի թերությունները կամ արգելի այդ վերելակի շահագործումը:

ՀՀԿ-ական Կորյուն Նահապետյանն էլ հարցրեց` կա՞ն, արդյոք, գազալցակայաններ, որոնք չեն անցել փորձաքննություն:

 Հայկարամ Մխիթարյանը պատասխանեց, որ կան փորձաքննություն չանցած գազալցակայաններ, բայց վստահ է, որ մինչև դեկտեմբերի 5-ը բոլոր գազալցակայանները կանցնեն փորձաքննություն: