Ռուս դիտորդները գոհ են Ադրբեջանում ընտրությունների ընթացքից, ընդդիմությունը բողոքում է

Ադրբեջանի նախագահ Իլհամ Ալիև այսօր ընդունել է ՌԴ պետդումայի ԱՊՀ, եվրասիական ինտեգրման  և հայրենակիցների կապերի հարցերով հանձնաժողովի նախագահ   Լեոնիդ Սլուցկիին, ով ղեկավարոմ է ՌԴ դիտորդական առաքելությունը Ադրբեջանի խորհրդարանական ընտրություններում:

Haqqin. az-ը հայտնում է, որ Սլուցկին Ալիևի հետ հանդիպմանը նշել է, որ իրենք եղել են տարբեր ընտրատարածքներում և, ի հեճուկս Արևմուտքի կանխատեսումների, օրենքի որևէ խախտում չեն արձանագրել, հակառակը՝ իրավիճակն անգամ ավելի դրական է նախորդ տարիների համեմատ:

Սլուցկին նաև խիստ քննադատել է ԵԱՀԿ-ի գրասենյակին՝ դիտորդական առաքելությունից հրաժարվելու համար և ասել, որ այդ քայլը վկայում է այն մասին, որ տվյալ ինստիտուտը  ապառել է  իր ժամկետը:

Միևնույն ժամանակ, contact.az-ը գրում է, որ ընդդիմությունը ողջ օրվա ընթացքում բազմաթիվ խախտումների մասին է հայտնում՝ կեղծումներ, ընտրատեղամասերում կողմնակի անձանց ներկայություն, դիտորդների աշխատանքին խոչընդոտող հանգամանքներ և այլն: