Հրապարակվել է Թետչերի հուղարկավորությանը հրավիրվածների ցուցակը

Մեծ Բրիտանիայի վարչապետ Դևիդ Քեմերոնի կայքում հրապարակվել է ապրիլի 17-ին կայանալիք` երկրի նախկին վարչապետ Մարգարետ Թետչերի հուղարկավորությանը հրավիրվածների ցուցակը. հայտնում է Лента.ру-ն:

Ցուցակում տեղ են գտել ավելի քան 200 երկրների ներկայացուցիչներ, որոնց հետ պաշտոնական Լոնդոնն ունի բնականոն դիվանագիտական հարաբերություններ, ինչպես նաև բրիտանական և ամերիկյան քաղաքական հաստատությունների անդամներ:

Դրանց թվում են` Թետչերի գլխավորած կաբինետի անդամները, Մեծ Բրիտանիայի նախկին վարչապետերը, ԱՄՆ նախկին նախագահները և Ռոնալդ Ռեյգանի ներկայացուցիչը, ԱՄՆ նախկին պետքարտուղար Հիլարի Քլինթոնը, բրիտանական գործող կառավարության անդամները, ընդդիմադիր Լեյբորիստական կուսակցության առաջնորդ Էդ Միլիբենդը, Եվրահանձնաժողովի նախագահ Ժոզե Մանուել Բարոզուն, Թետչերի նախկին մամլո քարտուղար սըր Բեռնարդ Ինգամը` կնոջ հետ, գրող Ֆրեդերիկ Ֆորսայթը, Մալայզիայի նախկին վարչապետ Մահաթհիր Մոհամադը և Նելսոն Մանդելայի ներկայացուցիչը: