Ցուցարարները ծեծել են Իրաքի փոխվարչապետին

Իրաքի փոխվարչապետ Սալեհ ալ Մութլաքը Անբար նահանգում հարձակման է ենթարկվել ցուցարարների կողմից:  Նա դեկտեմբերի 30-ին ժամանել էր հակակառավարական հանրահավաքին մասնակցելու եւ ելույթով հանդես գալու համար, հաղորդում է  «Ինտերֆաքսը»:

Երբ նա սկսել է խոսել, ցուցարարները բղավել են «դավաճան» եւ սկսել են նրա վրա նետել քարեր, շշեր եւ կոշիկներ: Թիկնապահները փոխվարչապետին փորձել են հեռացնել ամբիոնից, սակայն ցուցարարներին հաջողվել է հասնել փոխվարչապետին, պատռել հագուստն ու հարվածել դեմքին:

Սուննի բարձրաստիճան պետական պաշտոնյայի թիկնապահները կրակ են բացել՝ բարկացած ցուցարարներին ցրելու համար: Արդյունքում 2 մարդ է վիրավորվել:

Սուննիները ցույց են արել՝ բողոքելով շիական ղեկավարության՝ իրենց դեմ վարվող հալածական քաղաքականության դեմ: Բողոքի ակցիայի մասնակիցները պահանջում են չեղյալ համարել վերջերս Իրաքի իշխանությունների կողմից ահաբեկչության դեմ պայքարի ոլորտում ընդունված օրինագիծը, որն, ըստ նրանց, ուղղված է սուննիների դեմ: