Լուկաշենկոն փափկել է

Բելառուսի նախագահ Ալեքսանդր Լուկաշենկոն պատրաստ է ընդդիմադիր կեցվածքի համար ձերբակալված ակտիվիստներին ազատ արձակել: Այս մասին հայտնել է Բուլղարիայի ԱԳ նախարար Նիկոլայ Մլադենովն իր նամակում` ուղղված ԵՄ արտաքին գործերի եւ անվտանգության հարցերի գլխավոր հանձնակատար Քեթրին Էշթոնին եւ ԵՄ երկրների արտգործնախարարներին:

Ն. Մլադենովը վերջերս բանակցություններ է վարել Լուկաշենկոյի հետ եւ գրում է, որ Բելառուսի նախագահը ցանկանում է բարելավել հարաբերությունները ԵՄ-ի հետ:

Reuters-ը տեղեկացնում է, որ Լուկաշենկոն նաեւ ընդդիմության հետ բանակցելու ծրագրեր ունի, նույնիսկ ԵՄ-ին առաջարկել է «իմաստունների խումբ» ուղարկել Մինսկ, որը կոչված կլինի հետեւել այդ բանակցություններին եւ խթանել դրանք:

Ենթադրվում է, որ Լուկաշենկոն «փափկել» է, քանի որ երկիրը ֆինանսական խնդիրներ ունի, ազդել են նաեւ ԵՄ-ի կիրառած պատժամիջոցները: