Մեր անվերապահ հավատարմությունն ենք հայտնում Մայր Աթոռին. Բուլղարիայի Հայոց Թեմի անդամներ

Բուլղարիայի Հայոց Թեմի Առաջնորդական տեղապահը, 9 եկեղեցիների եկեղեցական վարչությունները, նաև 7 հասարակական ու քաղաքական կառույցներ հայտարարություն են տարածել՝ հերքելով «Հայկական ժամանակ» թերթում տպագրված լուրը, ըստ որի «Բուլղարիայի Հայոց Թեմի Թեմական Խորհուրդն իր լիակատար աջակցությունն ու համերաշխությունն է հայտնում Հայ Առաքելական Սուրբ Եկեղեցու տասը եպիսկոպոսների վերջին ուղերձին»։

«Սույն թվականի դեկտեմբերի 17-ին մեզ համար զարմանալի կերպով ականատես եղանք «Հայկական Ժամանակ» էլեկտրոնային կայքում հրապարակված մի հոդվածի, որտեղ, ի թիվս այլնի, նշվում էր, թե իբր «Բուլղարիայի Հայոց Թեմի Թեմական Խորհուրդն իր լիակատար աջակցությունն ու համերաշխությունն է հայտնում Հայ Առաքելական Սուրբ Եկեղեցու տասը եպիսկոպոսների վերջին ուղերձին»։

Թեև վստահ չենք, որ տվյալ հրապարակման մեջ արտահայտված տեսակետը արտացոլում է Թեմական Խորհրդի բոլոր անդամների ամբողջական կամքը, այնուամենայնիվ անհրաժեշտ ենք համարում այս առթիվ հրապարակավ հայտնել մեր անհամաձայնությունը նշված կայքում արտահայտված մտքերին։

Դատապարտելով նմանատիպ երևույթները՝ վերահաստատում ենք մեր անսակարկ ու անվերապահ հավատարմությունը Հայ Առաքելական Սուրբ Եկեղեցուն, ի դեմս հոգևոր կենտրոն Մայր Աթոռ Սուրբ Էջմիածնի, ինչպես նաև Ազգային Եկեղեցական Ժողովի կողմից օրինավոր կերպով ընտրված Ն.Ս.Օ.Տ.Տ. Գարեգին Բ Ամենայն Հայոց Կաթողիկոսին։

Ստորագրողներ՝

Բուլղարիայի Հայոց Թեմի Առաջնորդական տեղապահ

Հոգևոր դաս

Պլովդիվի «Սուրբ Գևորգ», Սոֆիայի «Սուրբ Աստվածածին», Բուրգասի «Սուրբ Խաչ», Ռուսեի «Սուրբ Աստվածածին», Պազարջիկի «Սուրբ Ստեփանոս», Խասկովոյի «Սուրբ Ստեփանոս», Սիլիստրայի «Սուրբ Աստվածածին», Սլիվենի «Սուրբ Ստեփանոս», Յամբոլի «Սուրբ Հակոբ» եկեղեցիների Եկեղեցական վարչություններ

«Բուլղարիայի Հայ Համայնք» ասոցիացիա

ՀԲԸՄ Սոֆիա

ՀԲԸՄ Պլովդիվ

ՀԲԸՄ Վառնա

ՀԲԸՄ Բուրգաս

«Հայ Յեղափոխական Դաշնակցություն» Կենտրոնական մարմին

«Հայ Օգնության Միության Բուլղարիայի» Կենտրոնական վարչություն

ՀՄԸՄ