Բոլոր վետերանները երջանի՞կ են

Հայաստանի վարչապետ Տիգրան Սարգսյանի համոզմամբ` մայիսի 9-ի տոնակատարություններին մասնակցող բոլոր վետերանները երջանիկ են: Վարչապետը նրանց աչքերում տեսնում է հպարտություն, տոնական տրամադրություն, հիշողություններ ու հաղթանակներ:

Անդրադառնալով վետերանների սոցիալական խնդիրներին` նա ասաց. «Ոչ ոքի համար գաղտնիք չէ, որ կան նյութական, սոցիալական խնդիրներ, բայց որ այսօր նրանք ուշադրության կենտրոնում են, որ այսօր փորձում ենք բարձր պահել նրանց պատիվը, հիշելով նաեւ անցավորներին, նրանք գնահատում են»:

Օրվա խորհուրդը, ըստ Տիգրան Սարգսյանի, այն է, որ մենք կարողացել ենք ապահովել մեր հաղթանակների շարունակականությունը` նաեւ Շուշիում հաղթանակ տոնելով: «Մեր վետերանները հպարտ են, որ Երկրորդ համաշխարհային պատերազմից հետո կարողացել ենք ունենալ նաեւ Ղարաբաղյան  հաղթանակներ, եւ Շուշիի ազատագրումը դրական ազդակներ է հաղորդում նաեւ մեր վետերաններին»,- ասաց նա:

Վարչապետը նշեց, որ թե' Հայրենական պատերազմի մասնակիցների, թե Ղարաբաղում զոհված ազատամարտիկների ընտանիքները պետք է գտնվեն պետության ուշադրության կենտրոնում: «Մենք առավելագույնը պետք է անենք, որ հոգանք նրանց խնդիրիները` առողջական, սոցիալական և տնտեսական, բոլոր խնդիրները պետք է կարողանանք լուծել»,- եզրափակեց նա: