Զելենսկին նշել է, որ Թրամփի հետ հանդիպման ժամանակ անընդունելի որոշումներ չեն եղել

Սպիտակ տանը այսօր կայացած հանդիպումների ընթացքում Ուկրաինայի համար անընդունելի որոշումներ չեն եղել։ Գործընկերների միջև տեղի են ունեցել բովանդակալից զրույցներ։ Այս մասին հաղորդում է ՌԲԿ-Ուկրաինան՝ հղում անելով նախագահ Վոլոդիմիր Զելենսկու ճեպազրույցին։

Մասնավորապես, նրան հարցրել են, թե արդյոք Սպիտակ տանը կայացած հանդիպմանը Ուկրաինայի համար անընդունելի լուծումներ են առաջարկվել, որոնք կվերաբերեին ռուս-ուկրաինական պատերազմի ավարտի ձևաչափին։

«Սա քննարկում է, երկխոսություն գործընկերների հետ։ Մեզանից յուրաքանչյուրն ունի իր փաստարկները։ Անընդունելի որոշումներ չեն եղել։ Կարծում եմ՝ մեզանից յուրաքանչյուրը կատարել է իր աշխատանքը», - պատասխանել է Զելենսկին։

Նաև նա մեկնաբանել է այն պահը, երբ Սպիտակ տանը ցուցադրվել է քարտեզ՝ ընթացիկ ռազմաճակատի գծով։ Նրա խոսքով՝ ինքը վիճել է «օկուպացված տարածքների յուրաքանչյուր տոկոսի համար»։

«Քարտեզի վրա ես ամերիկացի դաշնակիցներին ցույց տվեցի մարտադաշտի իրավիճակը, թե ով է իրականում վերահսկում մարտի դաշտը, մեր հողը, ժամանակավորապես օկուպացված տարածքները», - հավելել է նախագահը։