Կոչ ենք անում ՀՀ վարչապետին հարգել իր պաշտոնի սահմանափակումները և չմիջամտել եկեղեցական գործերին. հայտարարություն

Ֆրանսիայի հայկական կազմակերպությունների համախմբման խորհուրդը (CCAF) հայտարարություն է տարածել, որում ասվում է․

«Վարչապետ Նիկոլ Փաշինյանի կրկնվող հարձակումները Ամենայն Հայոց Կաթողիկոսի դեմ, նրա հրաժարականի կոչերը և նրա փոխարինման նպատակով համակարգող մարմնի ստեղծման նախաձեռնությունը համարվում են ամենալուրջ ոտնձգությունները Հայ Առաքելական Սուրբ Եկեղեցու նկատմամբ՝ ստալինյան ժամանակաշրջանից ի վեր:

CCAF-ը խստորեն դատապարտում է այս անընդունելի ճնշումները, որոնք հակասում են եկեղեցու և պետության բաժանման հիմնարար սկզբունքին եւ ուղղված են հայ ազգի պատմական ու հոգեւոր սյուներից մեկի թուլացմանը՝ այն պահին, երբ Հայաստանը կանգնած է արտաքին լուրջ սպառնալիքների և գոյաբանական մարտահրավերների առաջ:

CCAF-ը հանդիսավոր կերպով կոչ է անում վարչապետին հարգել իր պաշտոնի սահմանափակումները և ձեռնպահ մնալ միջամտելու եկեղեցական գործերին: Այն նաև իր ամբողջական աջակցությունն է հայտնում Ամենայն Հայոց Կաթողիկոս Գարեգին Բ-ին և Հայ Առաքելական Սուրբ Եկեղեցուն, որի հիմնարար դերը հայ ժողովրդի պատմության, գոյատևման ու համախմբման գործում կարիք չունի հիշեցման»: