Ամերիկյան կրոնական հանձնաժողովը կոչ է արել Թուրքիային` չմիջամտել Պոլսո պատրիարքարանի ներքին գործերին

ԱՄՆ կառավարությանը կից խորհրդատվական մարմին համարվող ԱՄՆ Միջազգային կրոնական ազատությունների հանձնաժողովը (USCIRF) 2019 թ. զեկույցում անդրադարձել է Թուրքիայի կրոնական ազատությունների խախտումներին և երկիրը ներառել  է «անհանգստացնող երկրների» ցուցակում. հաղորդում է Euronews-ի թուրքական ծառայությունը:

Ըստ զեկույցի` 2018 թ. կրոնական ազատությունները Թուրքիայում «շարունակում են անհանգստություններ առաջացնել, և մոտակա տարիներին լուրջ մտահոգություն կա, որ պայմաններն ավելի են վատանալու»:

Զեկույցում նշվում է, որ ազգային փոքրամասնությունների գոյությունը վտանգի տակ է, բացի այդ` պետական կառույցների և կառավարության կողմնակիցների` մամուլը սևացնելուն ուղղված արշավը ավելի է մեծացնում վախի մթնոլորտը փոքրամասնությունների խմբերում:

Ըստ USCIRF–ի զեկույցի` Միջազգային կրոնական ազատությունների օրենքի շրջանակում,  որպես «հատուկ անհանգստություն առաջացնող երկիր», Թուրքիան ներառվել է 2-րդ աստիճանի երկրների շարքում:

Զեկույցում անդրադարձ կա կրոնական գործիչ Ֆեթուլլահ Գյուլենին, ամերիկացի հոգևորական Էնդրյու Բրոնսոնին, Սբ Սոֆիայի տաճարի խնդրին (Էրդողանը բազմիցս հայտարարել է, որ պատրաստվում է թանգարանի կարգավիճակ ունեցող տաճարը դարձյալ մզկիթ դարձնել) և այլն:

Որպես դրական քայլ` նշվում է Թուրքիայի Հանրապետության պատմության մեջ առաջին անգամ Ստամբուլում ասորական ուղղափառ եկեղեցուն պատկանող եկեղեցու շինարարության թույլտվությունը և կառուցումը:

Նաև զեկույցում տեղ է գտել ԱՄՆ պետքարտուղար Մայք Պոմպեոյի հայտարարությունը հունական Հեյբելիադա կղզու վերաբերյալ` «Կոչ ենք անում անմիջապես վերաբացել Հեյբելիադայի հոգևոր դպրոցը»:

Զեկույցում նաև կոչ է արվում նաև չմիջամտել Հայ Առաքելական եկեղեցու պատրիարքական ընտրություններին: