Թյուրքական խորհուրդն իր աջակցությունն է հայտնել Թուրքիային Անկարայի դեմ ԱՄՆ պատժամիջոցներ կիրառելուց հետո

Թյուրքալեզու երկրների համագործակցության խորհրդի (Թյուրքական խորհրդի) անդամները դեկտեմբերի 16-ին կայացած նիստում հայտարարել են, որ աջակցում են Թուրքիային, որը դեմ է իր դեմ պատժամիջոցներ կիրառելու՝ ԱՄՆ որոշմանը: Այս մասին հայտնում է թուրքական Hürriyet-ը:

«Թուրքիայի դեմ միակողմանի պատժամիջոցներ կիրառելու՝ ԱՄՆ որոշումը անարդար է: Մենք Թուրքիայի կողմն ենք: Մենք պաշտպանում ենք Թուրքիայի առաջարկը՝ այս հարցը լուծել օբյեկտիվորեն, անկողմնակալ և քաղաքականապես չեզոք երկխոսության ու դիվանագիտության միջոցով»,- ասել է Թյուրքական խորհրդի գլխավոր քարտուղարի օգնական Քըսմեթ Գյուզելովը:

Հիշեցնենք, որ դեկտեմբերի 15-ին Միացյալ Նահանգները պատժամիջոցներ կիրառեց Թուրքիայի պաշտպանական արդյունաբերության վարչության, նրա ղեկավար Իսմայիլ Դեմիրի և երեք այլ պաշտոնատար անձանց նկատմամբ: