«Թվիթեր»-ում գրառումների հեռացման պահանջով Թուրքիան աշխարհում առաջինն է

«Թվիթեր»-ի թափանցիկության զեկույցի համաձայն, որը պատրաստվում է տարին 2 անգամ, 2018 թ. երկրորդ կեսին գրառումներ հեռացնելու պահանջով Թուրքիան առաջինն է. հաղորդում է BBC-ի թուրքական ծառայությունը:

Կազմակերպությունը հայտնում է, որ Թուրքիան «Թվիթեր»-ի օգտատերերի վերաբերյալ ամենաշատ տեղեկություններ պահանջող երկրներից է, սակայն այդ պահանջները երբեք չեն բավարարվել:

2018 թ. հուլիսի 1-ից դեկտեմբերի 31-ը ներառող զեկույցի համաձայն` Թուրքիան, բացի գրառումների հեռացման համար 597 դատական որոշումներից, 4417 այլ իրավական պահանջներ էլ է ուղղել: Թուրքիայի պահանջների արդյունքում 72 թվիթերյան էջ է փակվել, 355 թվիթ էլ` հեռացվել:

5014 պահանջ ներկայացրած Թուրքիային հաջորդում է Ռուսաստանը` 3344 պահանջ: «Թվիթեր»-ը շեշտում է, որ գրառումների հեռացման պահանջների 74 տոկոսը գալիս է Թուրքիայից և Ռուսաստանից: