Թուրքիայում ժողովրդավարությունը կքայքայվի. ԱՄՆ-ի արձագանքը` պատգամավորների անձեռնմխելիության վերաբերյալ որոշմանը

Միացյալ Նահանգներն արձագանքել է Թուրքիայում ընդունված նոր որոշմանը, որը թույլ է տալիս սահմանադրական մի շարք փոփոխություններ անել` պատգամավորներին անձեռնմխելիությունից զրկելու համար:

«Եթե այս փոփոխությունը հանգեցնի քաղաքական բանավեճերի կրճատման, ապա Թուրքիայում ժողովրդավարությունը կքայքայվի»,- տարածած գրավոր հայտարարության մեջ նշել է ԱՄՆ ԱԳ նախարարի փոխխոսնակ Մարկ Թոները:

Նրա խոսքով` ԱՄՆ-ը մտահոգություն ունի, որ ընդունված որոշումը կարող է բացասաբար ազդել Թուրքիայի տարածքում խոսքի ազատության վրա: «Թեև որոշումը վիճահարույց կամ անհանգստացնող է, սակայն հավատում ենք, որ քաղաքական բովանդակությամբ մտքի ազատությունը պետք է ապահովվի: Սա առավել կարևոր է, երբ խոսքը գնում է  երկրի քաղաքացիների կողմից ընտրված ներկայացուցիչների մասին»,- ասել է Թոները:

Նշենք, որ Գերմանիան նույնպես մտահոգություն է հայտնել Թուրքիայում ընդունված նոր որոշման կապակցությամբ: