Մենք կհարձակվենք և կազատենք մեր հողը. Պորոշենկո

Ուկրաինայի նախագահ Պյոտր Պորոշենկոն դադարեցրել է Դոնբասում  կրակի միակողմանի դադարեցման ռեժիմը. հայտնում է Лента.ру-ն՝ վկայակոչելով Ուկրաինայի նախագահի մամուլի ծառայությունը:

Այսպիսով՝ կրակի դադարեցման ռեժիմը, որը նախագահը հայտարարել էր հունիսի 20-ին և երկարացրել  մինչև հունիսի 30-ի ժամը 22:00-ն համարվում է ավարտված: 

«Մենք կհարձակվենք և կազատենք մեր հողը: Կրակի դադարեցման ռեժիմը չերկարացնելը մեր պատասխանն է ահաբեկիչներին, գրոհայիններին, ավազակներին, բոլոր նրանց, ովքեր ծաղրում են խաղաղ բնակչությանը, ովքեր կաթվածահար են անում շրջանի տնտեսության աշխատանքը, ովքեր տապալում են աշխատավարձերի, թոշակների վճարումը,  պայթեցնում են երկաթուղային ճանապարհը և ոչնչացնում ջրատարները:  Նրանց, ովքեր մարդկանց զրկել են նորմալ, խաղաղ կյանքից»,- նշել է նախագահը ժողովրդին ուղղված ուղերձում: