Սաֆարովներ` ռուսական բանակում

Այս տարվա հուլիսի 30-ին ռուսական բանակի 48315 զորամասում ազգությամբ ադրբեջանցի` արդեն 8 ամիս ծառայած զինվոր Էմիլ Աբդուլաեւը հարձակվել է նորակոչիկ Ժան Մերոյանի վրա: Ռուսաստանի հայերի «Երկրամաս» թերթը տեղեկացնում է, որ միջադեպը տեղի է ունեցել զուգարանում. ադրբեջանցին ուսով հրել է հային, իսկ ի պատասխան Մերոյանի հարցին, թե ինչու է այդպես իրեն պահում, Աբդուլաեւը հարձակվել է նորակոչիկի վրա ու բռունցքի հարվածով կոտրել նրա ծնոտը:

Մերոյանը ծնվել է Բաթումում, եւ նույն տարում էլ նրա ընտանիքը տեղափոխվել է Նովոռոսիյսկ, որտեղից էլ պատանուն զորակոչել են ռուսական բանակ:

Էմիլ Աբդուլաեւը ձերբակալվել է զինվորական դատախազության կողմից, նրա դեմ գործ է հարուցվել: Սակայն հնարավոր է, որ ադրբեջանցուն պարզապես այլ զորամաս տեղափոխեն, եւ նա շարունակի հարձակումները հայ զինծառայողների վրա, քանի որ, ըստ Մերոյանի պապի` Ալբերտ Դովլաթյանի, նրան ոգեշնչել է Ռամիլ Սաֆարովի օրինակը:

«Երկրամասը» համարում է, որ հայ համայնքը պետք է հետամուտ լինի, որ ադրբեջանցի հանցագործը արժանի պատիժը ստանա: