Ադրբեջանի ոտքն էլ քարին դիպավ

Կիպրոսի Հանրապետության կառավարությունը մտադիր է խոչընդոտել Ադրբեջանի եւ Հյուսիսային Կիպրոսի միջեւ չարտերային թռիչքների իրականացմանը. այսօր, ըստ ադրբեջանական ԶԼՄ-ների, այդ մասին գրել է կիպրական Fileleftheros թերթը:

Հունիսի 21-ին մեկնարկող չարտերային թռիչքների կապակցությամբ Կիպրոսի Հանրապետության նախագահ Դիմիտրիս Խրիստոֆիասը բանակցություններ է վարել քաղաքացիական ավիացիայի միջազգային կազմակերպության (ICAO) գլխավոր քարտուղար Ռոնալդ Բենջամինի, Եվրավերահսկողության եւ Թռիչքների անվտանգության համաշխարհային հիմնադրամի ներկայացուցիչների հետ եւ հայտնել իր մտահոգությունը:

Նախագահը նաեւ դատապարտել է Թուրքիայի կողմից ավիափոխադրումների վերաբերյալ միջազգային համաձայնագրերի խախտումները:

Աշխարհի ցանկացած կետից Հյուսիսային Կիպրոս կարելի է հասնել միայն Թուրքիայի կամ Հարավային Կիպրոսի տարածքով: Դա պայմանավորված է նրանով, որ Հյուսիսային Կիպրոսի Թուրքական Հանրապետությունը չի ճանաչվել որպես անկախ պետություն: Այդ պատճառով Էրջան մեկնող բոլոր ինքնաթիռները պարտավոր են տարանցիկ վայրէջք կատարել Թուրքիայի օդանավակայաններից մեկում, ինչը Կիպրոսի Հանրապետությունը համարում է անօրինական: