Ադրբեջանում պահվող ռազմագերիները, գերիները ռազմական գործողությունից հետո պետք է անհապաղ վերադարձվեին․ Աբրահամյան

Ազգային ժողովում մեկնարկել է Ադրբեջանում պահվող ռազմագերիների վերաբերյալ հրատապ քննարկումը:

«Պատիվ ունեմ» խմբակցության քարտուղար Տիգրան Աբրահամյանը հայտարարեց, որ Ադրբեջանի համար, որպես հակամարտության  կարգավորման հիմք, շարունակում է դրված լինել ուժի կամ դրա սպառնալիքի կիրառումը:

«Ադրբեջանի իրական նպատակը ոչ թե Հայաստանի հետ հարաբերությունների կարգավորումն է, այլ` Հայաստանի կենսական շահերի հաշվին Թուրքիայի ու Ադրբեջանի ծավալապաշտական, կայսերապաշտական նպատակների իրագործումը»,-  նշեց նա:

Պատգամավորի խոսքով` ադրբեջանական ցեղասպան քաղաքականության հետևանքով այս պահին, Ադրբեջանի պաշտոնական տեղեկություններով ու հաստատումով, Բաքվի բանտերում են գտնվում 23 հայեր, այդ թվում` Արցախի ռազմաքաղաքական նախկին և ներկա ղեկավարները: