Բակո Սահակյանն այցելել է Թալիշ

Արցախի Հանրապետության Նախագահ Բակո Սահակյանը նոյեմբերի 25-ին այցելել է Թալիշ գյուղ ու տեղում ծանոթացել այնտեղ իրականացվող ծրագրերի ընթացքին:

Այս մասին հայտնում են Արցախի նախագահի աշխատակազմի տեղեկատվության գլխավոր վարչությունից։

Նույն օրը Բակո Սահակյանը Դադիվանք գյուղի մոտակայքում գտնվող Սուրբ Աստվածածին միջնադարյան վանական համալիրի տարածքում հանդիպում է ունեցել «Ճանաչենք մեր երկիրը» երիտասարդական արշավի մասնակիցների հետ:

Նախագահ Սահակյանը գոհունակությամբ նշել է, որ նման արշավները դարձել են ավանդական՝ կարևորելով դրանք մատաղ սերնդի հայեցի դաստիարակության, հարազատ երկրի պատմությունը, մշակույթը, բնությունը ճանաչելու, ընկերական կապերն ամրապնդելու տեսանկյուններից:

Ջերմ և անմիջական մթնոլորտում արծարծվել են նաև երկրի ներքին ու արտաքին քաղաքականությանը, տարածաշրջանային գործընթացներին, սահմանադրական բարեփոխումների ընթացքին, երիտասարդական քաղաքականությանը վերաբերող հարցեր: