Մարգարյանի հիվանդանոցը հերքում է նորածնի մահվան լուրը

Shamshyan.com-ն այսօր տեղեկություն էր հրապարակել, որ առավոտյան Երևանում ամուսինը հղի կնոջը տեղափոխել է Մարգարյանի հիվանդանոց և որոշ ժամանակ անց տեղեկացվել, որ նորածինը մահացել է: Ըստ կայքի տեղեկությունների՝ ամուսինը կատարվածի մեջ մեղադրում է բժիշկներին:

Yerkir.am-ին, սակայն, հիշյալ հիվանդանոցից հայտնեցին, որ իրենց մոտ նորածին չի մահացել: Yerkir.am-ի հետ զրույցում Մոր և մանկան առողջության պահպանման գիտահետազոտական կենտրոնի նորածնային բաժանմունքի ղեկավար, ՀՀ ԱՆ գլխավոր նեոնատոլոգ Պավել Մազմանյանը հայտնեց, որ եղել է ներարգանդային կյանքում պտղի մահացության դեպք, ոչ թե` նորածնի:

Մեր  տեղեկություններով՝ մահացած պտուղն 8-ամսական է եղել:

Yerkir.am-ին քննչական կոմիտեից հայտնեցին, որ քննություն է տարվում պտղի մահվան հանգամանքները պարզելու համար, այս պահին քննիչը հիվանդանոցում է: