Ուրիշի փոխարեն քվեարկած պատգամավորները հարկ չեն համարել ներկայանալ էթիկայի հանձնաժողովի նիստին

Այսօր ԱԺ էթիկայի հարցերով ժամանակավոր հանձնաժողովի նիստում քննարկվել է լրագրող Լիլիթ Լալայանի դիմումը 7 պատգամավորների վերաբերյալ: Հիշեցնենք, որ լրագրողը դիմել էր էթիկայի հանձնաժողովին՝ տրամադրելով տեսանյութեր այն մասին, թե ինչպես են ԲՀԿ խմբակցության պատգամավորներ  Արշակ Մխիթարյանը, Բազմասեր Առաքելյանը, ՀՀԿ-ական պատգամավորներ Սպարտակ Մելիքյանը, Համլետ Հարությունյանը, Կարեն Սարիբեկյանը, Սեյրան Սարոյանը, Առաքել Մովսիսյանը քվեարկում ուրիշի փոխարեն, ինչը ԱԺ կանոնակարգ-օրենքի խախտում է:

Էթիկայի հանձնաժողովը, այսօր քննելով լրագրողի դիմումը, որոշում չի կայացրել, նիստը տեղափոխվել է և կկայանա փետրվարի 18-ին:

Նշենք, որ էթիկայի հանձնաժողովը նիստին հրավիրել էր բոլոր այդ յոթ պատգամավորներին, որոնց վերաբերյալ հարցը պետք է քննվեր, սակայն նրանից ոչ մեկը չէր ներկայացել  նիստին: ԱԺ կանոնակարգ-օրենքը հնարավորություն ընձեռում է այդ  պատգամավորներին նիստին ներկա չգտնվել, բայց նրանք տասն օրվա ընթացքում գրավոր պարզաբանումներ պետք է ներկայացնեն հանձնաժողովին: