Մոուրինիոն իր մասին գիրք կհրատարակի

Պորտուգալացի մարզիչ Ժոզե Մոուրինիոն, ով այժմ գլխավորում է Մադրիդի «Ռեալ»-ը, այս տարվա հոկտեմբերին ինքնակենսագրական գիրք կհրատարակի` «Իմ ֆուտբոլ» խորագրով:

Մոուրինիոյի մասին գրված մի քանի գրքեր կան, սակայն նոր գիրքը գրված է լինելու հենց նրա կողմից` յուրահատուկ պորտուգալական ոճով: Ինքնակենսագրության մեջ մարզիչը, ով հունվար ամսին դարձավ 50 տարեկան, անդրադարձել է իր մարզչական կարիերային` «Ինտեր»-ի վերելքներին, «Չելսի»-ում կատարած աշխատանքին և ներկայիս ակումբի` Մադրիդի «Ռեալ»-ի իրավիճակի մասին:  РИА «Новости»-ի հաղորդմամբ` գիրքը ներառում է շատ պատմություններ, որոնք նախկինում հրապարակված չեն եղել:

Իր մարզչական կարիերայի ընթացքում պորտուգալացին երկու անգամ նվաճել է Չեմպիոնների լիգայի գավաթը («Պորտու»-ի և «Ինտեր»-ի հետ), ՈՒԵՖԱ-ի գավաթը: Նրա ղեկավարած ակումբները դարձել են երկրի առաջնության չեմպիոններ, մի քանի անգամ` գավաթակիրներ  և սուպերգավաթակիրներ: