Ըստ Նալբանդյանի` միջադեպերի պատասխանատուն Ադրբեջանն է

Հրաժարվելով շփման գծում միջադեպերի հետաքննման մեխանիզմների ստեղծման նախաձեռնությունից՝ Ադրբեջանն իր վրա է վերցնում դրանց պատասխանատվությունը. այսօր մամուլի ասուլիսում նշել է Հայաստանի արտգործնախարար Էդվարդ Նալբանդյանը:

Ըստ նրա՝ բանակցային գործընթացում առաջընթացի բացակայության պատճառը Ադրբեջանի այդ ապակառուցողական մոտեցումն է, սակայն նախարարն ընդգծել է, որ խաղաղ բանակցություններն այլընտրանք չունեն:

Դիտարկմանը, թե Բաքվում պնդում են, որ իրենց դիրքորոշմանն աջակցում է միջազգային հանրությունը, Նալբանդյանը պատասխանել է. «Այնքան երկար են փորձել խաբել սեփական ժողովրդին, որ արդեն իրենք էլ են սկսում հավատալ իրենց ասածին»:

Նա հիշել է ԻԿԿ-ի եւ Չմիավորման շարժման հայտարարությունները, որոնց վրա հիմնվում է Ադրբեջանը. «Ցանկանում եմ հիշեցնել, որ ո'չ առաջինը, ո'չ էլ երկրորդը Ղարաբաղյան կարգավորմամբ չեն զբաղվում: Կարգավորման գործընթացը ԵԱՀԿ ՄԽ ձեւաչափով է ընթանում, որի շրջանակում ընդունված հայտարարությունները համահունչ են Հայաստանի դիրքորոշմանը»: