Իրանի նախագահը հաջ է կատարելու

Սաուդյան Արաբիայի թագավոր Աբդուլլան Իրանի նախագահ Մահմուդ Ահմադինեժադին հրավիրել է հաջ անել Մեքքա. գրում է The Daily Star-ը` վկայակոչելով Էր Ռիադում Իրանի դեսպան Մոհամեդ Հոսեյնին:

Դեսպանը նաեւ նշել է, որ նախագահն արդեն ընդունել է հրավերը եւ հաջորդ շաբաթվա սկզբին կմեկնի Սաուդյան Արաբիա:

Ավելի վաղ, Ահմադինեժադն ասել էր, թե ուխագնացություն կատարելու ցանկություն ունի, սակայն սուրբ վայրեր կմեկնի միայն այն դեպքում, երբ հրավիր ստանա Սաուդյան թագավորից:

Իրանի նախագահի` ԶԼՄ-ների հետ կապերի հարցերով խորհրդական Ալի Աքբար Ջավաֆեքրը հայտարարել է, որ Ահմադինեժադի այցը կարեւոր փուլ կլինի երկու երկրների հարաբերություններում:

Հիշեցնենք, որ մոտ մեկ ամիս առաջ ամերիկյան հատուկ ծառայությունները հայտարարեցին, թե Վաշինգտոնում Սաուդյան Արաբիայի դեսպանի դեմ իրանցիները մահափորձ են կազմակերպել, ինչն էլ երկու երկրների հարաբերությունների կտրուկ սառեցում էր առաջացրել: Երկուսն էլ հայտարարեցին, որ բողոքելու են ՄԱԿ` Էր Ռիադը` մահափորձի կազմակերպման, Թեհրանը` զրպարտության համար:

Ի դեպ, մինչ այդ էլ երկու երկրների հարաբերությունները բարձրության վրա չեն եղել. նրանք Պարսից ծոցի տարածաշրջանում հիմնական հակառակորդներ են. պայքարում են ոչ միայն կրոնական, այլեւ քաղաքական ու ռազմական ոլորտներում առաջատար լինելու համար: