Բայդենի և Պուտինի առերես զրույցը օգտակար կլինի ԱՄՆ-ի և Ռուսաստանի համար. Էնթոնի Բլինքեն

ԱՄՆ պետքարտուղար Էնթոնի Բլինքենի կարծիքով՝ ԱՄՆ նախագահ Ջո Բայդենի և ՌԴ նախագահ Պուտինի առերես զրույցը երկու երկրների համար օգտակար կլինի: Այս մասին նա ասել է Financial Times-ին տված հարցազրույցում:

«Կան նաև համագործակցության համար փոխադարձ հետաքրքրություն ներկայացնող ոլորտներ: Մենք արդեն տեսել ենք դրանցից մեկը. դա START III-ի երկարաձգումն է: Կան, այսպես կոչված, ռազմավարական կայունության այլ ոլորտներ, որտեղ կարելի էր առաջընթաց արձանագրել»,- ասել է Բլինքենը:

Նա հավաստիացրել է, որ ԱՄՆ-ը շահագրգռված չէ Ռուսաստանի հետ լարվածության սրմամբ, բայց զգուշացրել է, որ Վաշինգտոնը պատրաստ է պատասխան հարվածներ հասցնել, եթե Մոսկվան անխոհեմ պահի իրեն: «Մենք հետաքրքրված չենք սրացումով: Մենք կցանկանայինք ավելի կանխատեսելի հարաբերություններ ունենալ Ռուսաստանի հետ, բայց դա կախված է Պուտինից: Եթե Ռուսաստանը շարունակի անխոհեմ ու ագրեսիվ գործել, կարող է վստահ լինել, որ մենք կպատասխանենք»,- ասել է Բլինքենը: