Թուրքիան մասնակցում է Արցախյան հակամարտությանը. Հունաստանի արտգործնախարար

Հունաստանի արտաքին գործերի նախարար Նիկոս Դենդիասը մեկնաբանել է տարածաշրջանում Թուրքիայի իշխանությունների վարած քաղաքականությունը:

Թուրքիան մասնակցում է Արցախյան հակամարտությանը, Միջերկրական ծովում և Կիպրոսում նրա պահվածքը հակասում է միջազգային իրավունքին: Այս մասին, ըստ ՌԻԱ «Նովոստի»-ի, հայտարարել է Հունաստանի արտաքին գործերի նախարար Նիկոս Դենդիասը Բրատիսլավայում սլովակ գործընկեր Իվան Կորչկի հետ հանդիպումից հետո:

Դենդիասի խոսքով` ինքն իր սլովակ գործընկերոջը տեղեկացրել է Արևելյան Միջերկրական ծովի իրադրության, տարածաշրջանում Թուրքիայի ապօրինի պահվածքի մանրամասների և այն մասին, թե ինչպես է Թուրքիան անտեսում միջազգային իրավունքը:

«Մենք նաև հնարավորություն ունեցանք խոսելու Լեռնային Ղարաբաղի մասին, թե որքանով դա կարող է վտանգավոր լինել: Կա մեկ կարևոր տարր, որը միշտ առկա է մեր տարածաշրջանի շուրջ ճգնաժամերի ժամանակ, դա Թուրքիան է: Թուրքիան ներխուժեց Սիրիա, Իրաք, Թուրքիան ջիհադիստներ ուղարկեց Լիբիա, իսկ այժմ Թուրքիան նաև ներգրավված է Արցախյան հակամարտության մեջ: Թուրքիան դառնում է կայունություն խախտող մեր տարածաշրջանում»,- ասել է նա: