Մարդկության պարտքն է ճանաչել Հայոց ցեղասպանությունը. Հունաստանի արտգործնախարար

Հունաստանի արտգործնախարար Նիկոս Դենդիասը հայտարարել է Օսմանյան կայսրությունում Հայոց ցեղասպանության հետագա միջազգային ճանաչման անհրաժեշտության մասին։

«Այս տարի Հունաստանը ոգեկոչում է Հայոց ցեղասպանության զոհերի հիշատակը: Մեր մտքերը մեր հայրենիքում և ամբողջ աշխարհում ապրող հայերի հետ են: Ցեղասպանության միջազգային ճանաչման աշխարհագրության ընդլայնումը մարդկության պարտքն է»,- գրել է Դենդիասը սոցցանցում:

Նա հրապարակել է իր լուսանկարը՝ արված 2020 թվականի հոկտեմբերին՝ Երևանում Ծիծեռնակաբերդ կատարած այցի ժամանակ, որտեղ նախարարը ծաղկեպսակ է դրել Ցեղասպանության զոհերի հիշատակը հավերժացնող հուշակոթողին։