Թրամփը կստորագրի Ռուսաստանի դեմ պատժամիջոցների մասին նախագիծը․Սպիտակ տուն

ԱՄՆ նախագահ Դոնալդ Թրամփը կստորագրի օրինագիծը, որը նախատեսում է լրացուցիչ պատժամիջոցների սահմանում Ռուսաստանի դեմ։ Այս մասին հայտնել են Սպիտակ տան ներկայացուցիչները։

«Թրամփը ծանոթացել է օրենքի նախագծի վերջնական տարբերակի հետ, և քանի որ նրա դիտողությունները հաշվի են առնվել, ուրեմն նա համաձայն է այդ օրենքի նախագծին և ստորագրի այն»-հայտարարել է Սպիտակ տան ներկայացուցիչ Սարա Սանդերսը։

Ամերիկյան կոնգրեսի երկու պալատներն էլ ընդունել են այդ օրենքի նախագիծը, որը նախատեսում է պատժամիջոցներ նաև Իրանի ու Սիրիայի դեմ։ Սակայն ԱՄՆ-ում մտահոգություններ էին հնչում, որ Թրամփը, հնարավոր է, չստորագրի այդ նախագիծը և վետո դնի։

Ամերիկայի նոր նախագահը հակված էր հարթել լարված հարաբերությունները Ռուսաստանի հետ, սակայն, ինչպես նշում են փորձագետները, Թրամփը եթե վետո դնի նախագծի վրա, ապա նրան կկասկածեն Կրեմլի հետ համագործակցելու մեջ։