Կալիֆոռնիայի համալսարանի դեկանը պաշտոն կզբաղեցնի Ամերիկյան համալսարանում

Կալիֆոռնիայի համալսարանի «Մերջ» կառավարման  դպրոցի նախկին դեկան և պատվավոր պրոֆեսոր Դեյվիդ Հ. Բլեյքը այս ամիս ստանձնել է Հայաստանի ամերիկյան համալսարանի գործարարության և տնտեսագիտության ֆակուլտետի դեկանի պաշտոնակատարի պաշտոնը. տեղեկացնում են Ամերիկյան համալսարանից:

«Ինձ համար պատիվ է այս պաշտոնում  ընտրվելը,- նշել է Բլեյքը,- ՀԱՀ-ի կառավարման  և տնտեսագիտության ֆակուլտետը տարածաշրջանի  առաջատարներից է և ես տպավորված եմ  ուսանողների, դասախոսների և  աշխատակիցների ցուցաբերած նվիրումից  համալսարանի,  կառավարման  ու տնտեսագիտության ֆակուլտետի, ինչպես նաև համալսարանի շրջանավարտների և գործարար հանրության հանդեպ»:

Պրոֆեսոր Բլեյքը «Բետա Գամա Սիգմա»-ի` միջազգային բիզնես կազմակերպության, Բարոյագիտական բիզնեսի  կառավարման կենտրոնի տնօրենն է: Նա նաև Կալիֆոռրնիա նահանգի որակավորված միջնորդ / հաշտարար է` մասնագիտացած կառավարման, աշխատանքային և ընտանեկան հարցերի միջնորդության ոլորտում: