Ձերբակալվել է Կադաֆիի մամուլի խոսնակը

Երեկ Սիրտ քաղաքի ծայրամասում ձերբակալվել է Մուամար Կադաֆիի մամուլի խոսնակ Մուսա Իբրահիմը:

Այս տեղեկատվությունը France Presse գործակալության թղթակցի հետ զրույցում հաստատել են լիբիական նոր վարչակազմի զինված ուժերի մի քանի դաշտային հրամանատարներ: Ըստ նրանց` Իբրահիմը փորձել է մեքենայով գաղտնի լքել քաղաքը եւ կանացի զգեստով է եղել: Որոշ տեղեկությունների համաձայն էլ` նա փորձել է փախչել` խառնվելով փախստականների խմբին:

Մուսա Իբրահիմը Կադաֆիի վարչակազմում զբաղեցնում էր տեղեկատվության նախարարի պաշտոնը եւ փաստացի կատարում էր գնդապետի մամուլի խոսնակի պարտականությունները: Անմիջական մասնակցություն ռազմական գործողություններին նա չի ունեցել: