Թեհրանը Մոսկվային միջոցներ է առաջարկում պատժամիջոցները շրջանցելու համար

Իրանը մտադիր է Ռուսաստանի Դաշնության հետ առևտրային գործողություններ իրականացնել երկու երկրների ազգային արժույթներով՝ ռուբլիով և թումանով։ Այս մասին հայտնում է РИА Новости-ն՝ հղում անելով Իրանի Կենտրոնական բանկի միջազգային հարցերով ղեկավարի տեղակալ Մոհսեն Քարիմիին։

Նրա խոսքով՝ ռուսական կողմի հետ արդեն կան որոշակի պայմանավորվածություններ:

«Կան պայմանավորվածություններ և հնարավորություններ։ Իրանը պարզապես ցանկանում է դրանք օգտագործել Ռուսաստանի հետ ռուբլիով և թումանով առևտրային գործողություններ իրականացնելու համար»,- պարզաբանել է Քարիմին:

Առևտրի ոլորտում Մոսկվայի և Թեհրանի հետագա համագործակցության մանրամասներն այս պահին չեն հաղորդվում։

Բացի դրանից, Քարիմիի խոսքով, Թեհրանը Մոսկվային միջոցներ է առաջարկել պատժամիջոցներից խուսափելու համար։

«Իրանը, հիմնվելով վերջին տարիներին պատժամիջոցների տակ գտնվելու՝ իր հարուստ փորձի վրա, ձեռնարկել է անհրաժեշտ միջոցներ ամերիկյան գերիշխանության և թշնամական երկրների ազդեցությունից դուրս գալու համար, որոնք նա առաջարկել է ռուսական կողմին»,- ասել է Քարիմին։