«Պոբեդա»-ն դեկտեմբերի 23-ից կվերսկսի թռիչքները դեպի Հայաստան

«Պոբեդա» ավիաընկերությունը 2022 թվականի դեկտեմբերի 23-ից կվերսկսի թռիչքները դեպի Հայաստան։ Չվերթները կիրականացվեն Մոսկվա-Գյումրի երթուղով, ասվում է ընկերության հաղորդագրության մեջ

««Պոբեդա» լոուքոսթերը pobeda.aero պաշտոնական կայքում բացել է Մոսկվա-Գյումրի չվերթի տոմսերի վաճառքը։ Թռիչքներն այս երթուղով կսկսվեն դեկտեմբերի 23-ից»,- ասվում է հաղորդագրության մեջ:

Մոսկվայի «Վնուկովո» օդանավակայանից թռիչքներ կիրականացվեն շաբաթական չորս անգամ, գրում է ՏԱՍՍ-ը։

Այս տարվա գարնանից «Պոբեդան» ամբողջությամբ դադարեցրել է թռիչքները դեպի արտերկիր՝ միջազգային պատժամիջոցների և օդային տրանսպորտի դաշնային գործակալության համապատասխան առաջարկությունների պատճառով: Այժմ արտասահմանյան ուղղություններից ավիաընկերությունը թռիչքներ է իրականացնում միայն Մինսկ։