Չավուշօղլուն ասել է, թե ինչու է ցույց տվել «գորշ գայլերի» ժեստը

Թուրքիայի ԱԳ նախարար Մևլյութ Չավուշօղլուն խոսել է Ուրուգվայի հայ համայնքի ներկայացուցիչներին իր ցույց տված` «գորշ գայլերի» ժեստի մասին, որը մեծ աղմուկ է բարձրացրել։

Չավուշօղլուն, մասնավորապես, ասել է, որ Ուրուգվայի իշխանությունները Թուրքիայի դեսպանին հավաստիացրել են, որ թույլ չեն տա հայ համայնքի ներկայացուցիչներին` մոտենալ նոր բացվելիք դեսպանատն շենքին։

«Սխալ էր թույլ տալ այս խմբին գնալ այնտեղ, մանավանդ, որ համապատասխան խոստում է տրվել։ Իսկապես, ցուցարարներն իրենց տգեղ են պահել։ Այս անընդունելի այլանդակ պահվածքից հետո մենք էլ տվեցինք պահանջվող պատասխանը: Մեր ժեստը վիրավորանք չէ Ուրուգվայի իշխանությունների, Ուրուգվայի ժողովրդի կամ ցուցարարների հասցեին։ Ուստի տեղին չէ, որ նրանք մեզ մեղադրեն»,- ասել է նա։

Թուրքիայի ԱԳՆ ղեկավարն ասել է, որ պետք է նայել դեպի ապագան։ Չավուշօղլուն վստահեցրել է, որ իրենք խնդիրներ չունեն Ուրուգվայի հետ և ցանկանում են նոր թափ հաղորդել երկկողմ հարաբերություններին։

Հիշեցնենք, որ այդ ժեստից հետո Թուրքիայի դեսպանը կանչվել էր Ուրուգվայի ԱԳՆ, իսկ ԱԳՆ ղեկավարը դատապարտել է թուրք նախարարի արարքը: