Հունաստանի վարչապետը Թուրքիայից պահանջել է չեղարկել 1995 թ. որոշումը, որը կարող է պատերազմի առիթ դառնալ

Հունաստանի վարչապետ Կիրիակոս Միցոտակիսը Թուրքիայից պահանջել է չեղարկել թուրքական խորհրդարանի՝ 1995 թվականի հունիսի 9-ի որոշումը, ըստ որի՝ Էգեյան ծովում տարածքային ջրերը 6-ից մինչև 12 ծովային մղոն ընդլայնելու՝ Հունաստանի միակողմանի նախաձեռնությունը Թուրքիայի կողմից կընկալվի որպես պատերազմ հայտարարելու առիթ` casus belli:

Հիշեցնենք, որ 2020 թվականի օգոստոսին Հունաստանը, Իտալիայի հետ համաձայնությամբ, ընդլայնել է իր ափամերձ ծովային գոտին 6 ծովային մղոնից մինչև 12։ Այնուհետև Միցոտակիսն ասել է, որ Հունաստանն իրեն իրավունք է վերապահում նմանատիպ ընդլայնում իրականացնել այլ ծովերում, ինչի հետ Թուրքիան կտրականապես համաձայն չէ` խոստանալով համարժեք պատասխան տալ նման գործողությանը: