Չավուշօղլուն ՆԱՏՕ-ին կոչ է արել աջակցել Ուկրաինայի եւ Վրաստանի՝ դաշինքին անդամակցելու ձգտմանը

ՆԱՏՕ-ն պետք է աջակցի ոչ միայն Ուկրաինայի և Վրաստանի տարածքային ամբողջականությանը, այլև դաշինքին միանալու՝ այդ երկրների ցանկությանը: Այս մասին Վարշավայի անվտանգության ֆորումում հայտարարել է Թուրքիայի արտգործնախարար Մևլյութ Չավուշօղլուն. հայտնում է «Ուկրինֆորմը»:

«Իհարկե, մենք պետք է շարունակենք աջակցել սևծովյան երկու երկրներին՝ Ուկրաինային և Վրաստանին: Եվ ոչ միայն նրանց տարածքային ամբողջականությանն է պետք աջակցել, այլև ամրապնդել նրանց կարողությունները, մասնավորապես՝ ՆԱՏՕ-ի հետ ավելի լավ հարաբերությունների, այդ թվում՝ նրանց ձգտումների հարցում: Եվ մենք շատ լավ գիտենք այդ ձգտումները: Լեհաստանն ու Թուրքիան այն քչերն են, ցավոք, միայն մի քանիսը, ՆԱՏՕ-ի դաշնակիցները, որոնք այս հարցը բարձրացնում են յուրաքանչյուր նախարարական հանդիպման և յուրաքանչյուր գագաթնաժողովի ընթացքում», - ասել է նա:

Թուրքիայի արտգործնախարարը նաև հիշեցրել է, որ «Ղրիմն ուկրաինական է»: «Մենք չենք ճանաչում և չենք ճանաչի Ղրիմի անօրինական միացումը»,- ասել է Չավուշօղլուն: