Քուրդ գործիչներին ձերբակալող Անկարան կոչ է անում ՌԴ-ին՝ անհապաղ ազատ արձակել Ղրիմում ձերբակալված թաթարներին

Թուրքիան մտահոգված է Ռուսաստանի անվտանգության ուժերի կողմից Ղրիմի թաթարների մեջլիսի փոխնախագահ Նարիման Ջելյալի ձերբակալությամբ: Այս մասին հայտարարել է Թուրքիայի ԱԳՆ մամուլի քարտուղար Թանժու Բիլգիչը:

Նրա խոսքով` Ջելյալին ձերբակալել են տանը և տարել անհայտ ուղղությամբ: Մինչ այժմ նրանից ոչ մի նորություն չկա։

«Մենք անհանգստացած ենք Նարիման Ջելյալի և Ղրիմի չորս այլ թաթարների ձերբակալությամբ և ցանկանում ենք նրանց շուտափույթ վերադարձնել իրենց տները»,- ասել է Թուրքիայի ԱԳՆ-ի խոսնակը:

Ավելի վաղ Ղրիմի թաթար ժողովրդի մեջլիսի խոսնակ Ռեֆաթ Չուբարովը սոցիալական ցանցերում հայտնել էր Ջելյալի ձերբակալության մասին:

Նշենք, որ ԱՄՆ պետդեպը նույնպես քննադատել է թաթար գործչի ձերբակալությունը։