ԱՄՆ գեներալներն ու ծովակալները պահանջում են աշխատանքից ազատել Պենտագոնի ղեկավարին

ԱՄՆ-ում 87 գեներալներ և պաշտոնաթող ծովակալներ բաց նամակ են ստորագրել՝ ուղղված պաշտպանության նախարար Լլոյդ Օսթինին և շտաբների պետերի միացյալ կոմիտեի ղեկավար Մարկ Միլիին, որում նրանցից պահանջել են հեռանալ իրենց պաշտոններից: Նամակը հրապարակվել Է Աֆղանստանից ամերիկյան զորքերի դուրսբերման ֆոնին. հաղորդում է Flag Officers for America կազմակերպությունը:

Օսթինին ու Միլիին կոչ են արել հրաժարական տալ խղճի մտոք։ «Նրանք ամեն բան չեն արել զորքերի դուրսբերման աղետալի հետևանքներից խուսափելու համար: Այդ աղետի հետևանքները հսկայական են և իրենց զգացնել կտան տասնամյակներ շարունակ»,- համոզված են զինվորականները:

Նամակում  ասվում է, որ ԱՄՆ ուժերի հապճեպ նահանջը հանգեցրել է նրան, որ դաժան հակառակորդի վերահսկողության տակ գտնվող վտանգավոր շրջաններում անհայտ թվով ամերիկացիներ և աֆղանցիներ են մնացել, որոնք աջակցում էին ամերիկյան ներկայությանը։