Տաջիկստանում աֆղանցի փախստականների ճամբար է կառուցվելու

Տաջիկստանում ճամբար կկառուցվի «Թալիբան» արմատական շարժման զինյալներից փախչող աֆղանցիների համար: Այս մասին հայտարարել է Խաթլոնի շրջանի ղեկավար Կուրբոն Հակիմզոդան. հաղորդում է «Ասիա-պլյուսը»:

Նրա խոսքով՝ Տաջիկստանի ՆԳՆ-ի ու միջազգային կազմակերպությունների աջակցությամբ երկրի հարավում կառուցվում է Աֆղանստանի քաղաքացիների տեղավորման ժամանակավոր բազա: Հատուկ տարածքներում փախստականներին տրամադրվում են վրաններ և տաք կերակուր:

«Պետք չէ մոռանալ, որ մեր երկրում քաղաքացիական պատերազմի տարիներին աֆղանցիներն ընդունեցին մեր քաղաքացիներին, ամիսներ շարունակ նրանց ապահովել են բնակարանով և սնունդով: Այսօր նրանք անախորժությունների մեջ են, և մենք պարզապես մարդկայնորեն պարտավոր ենք օգնել»,- աֆղանցիներին օգնելը հիմնավորել է Հակիմզոդան: