ՄԱԿ-ի գլխավոր քարտուղարը դիմել է Իսրայելին և Պաղեստինին

ՄԱԿ-ի գլխավոր քարտուղար Անտոնիո Գուտերեշը Պաղեստինին և Իսրայելին կոչ է արել անհապաղ դադարեցնել ռազմական գործողությունները. հայտնում է BBC-ն՝ վկայակոչելով Գուտերեշի պաշտոնական ներկայացուցիչ Շտեֆան Դյուժարիկի հայտարարությունը:

«Գլխավոր քարտուղարը կոչ է անում բոլոր կողմերին` անհապաղ դադարեցնել մարտերը Գազայում և Իսրայելում»,- ասել է Դյուժարիկը:

ՄԱԿ-ը կոչ է անում Իսրայելին և Պաղեստինին` թույլ տալ միջնորդական օգնություն ցուցաբերել հակամարտության կարգավորման գործում: Դյուժարիկի խոսքով՝ ռազմական գործողությունները կարող են առաջացնել մարդասիրական, ինչպես նաև անվտանգության ճգնաժամ և էլ ավելի թեժացնել ծայրահեղականությունը ամբողջ տարածաշրջանում: